QINEQQUSAARNERMI PROGRAMMI
Meeqqat inuusuttullu
ULLUUNERANI PAAQQINNITTARFIIT
Kommuneqarfik Sermersooq kommuniuvoq alliartortoq minnerunngitsumillu nuannaarutissaavoq, kommunimi meeqqat amerlanerummata, taamaattumillu meeqqat atualersimanngitsut Demokraatit aamma uummammiorilluinnarpaat. Demokraatit kommunip innuttaasa nukarliit 0-5 ukiullit pitsaasunik sinaakkuteqarnissaannik qulakkeerinninnissamut suliaqarnertik ingerlateqqikkusuppaat. Soorlu taaneqareersoq Demokraatit ulluunerani paaqqinnittarfeqarnerup nukittorsartuarnissaanik suliaqarnissartik kissaatigaat aammalu ilaatigut siunniussimallugu pineqartumi sulisut ikinnerpaaffissamiitinnissaannut piumasaqaatit naammassinissaat.
Ulluunerani paaqqinnittarfiit paarsiffiinnaassanngillat – ukuussapput, meeqqatsinnik pinnguarneq aqqutigalugu ineriartortitsisut taamaasillutik meeqqat atuarfiannut piareersimaniassammata. Annertunerujussuarmik eqqarsaatigineqartariaqarpoq privatimik paarsisitsinissanik periarfissat aammalu taakku ilinniartillugillu allagartartaartinneqarnissaat. Paaqqinneqarnissamik qulakkeerinninneq tamanut atuutissaaq.
Qinigaaffimmi tulliuttumi meeqqat suli atualersimanngitsut ukkatarineruniarpavut. Isumaginnittut akissarsiagissaarnerulerput, maannakkullu annertuumik sulissutiginialerparput suliffimmi atugarissaarneq aammalu ulluunerani paaqqinnittarfinni sinaakkutit pitsaanerusut, isumaginnittut pikkoriffitik meeqqanut taakkulu ineriartornerannut atorniassammatigit. Tassungalu ilutigalugu ulluunerani paaqqinnittarfinnit atuarfimmut ikaarsaarnerup eqaannerusumik pinissaa sulissutigerusupparput taamaaliornikkut paaqqinnittarfiit atuarfiillu akornanni suleqatigiinneq nukittorsarneqassammat.
Qinigaaffimmi tullermi nutaami suliaq aallartinneqassaaq, ulluunerani paaqqinnittarfinni sulisut suliffimminni atugarisaasa piumasaqaatillu iliuusissatut pilersaarummik siunnersuummik inerneqartussanngorlugit.
MEEQQAT ATUARFIAT INUUSSUTISSARSIUTINULLU ILINNIARNEQ
Demokraatit anguniagarivaat, Kommuneqarfik Sermersuumi meeqqat atuarfiat siulliulluni toqqarneqartassasoq. Suliniarnermi Demokraatit pingaartippaat atuarfinni siulersuisut, atuartut, sulisut aamma angajoqqaat peqataatinneqarnissaat. Meeqqatta ilinniagaqarnerat nukittorsarniarparput, tamaaliornermili atuarfiit pitsaanerusut ilinniartitsisullu suli pitsaanerusut pisariaqartippaat. Atuarfitta illutaat faginilu sinaakkutissat pitsanngorpata, atuartut pitsaanerpaanik pikkorissarnissaminnut periarfissaqalissapput taamaalillutillu ilinniarsinnaalerlutik suliffittaarlutik, inuiaqatigiinnut tamarmut nukittorsaaqataasussamik.
Ullumikkut imaappoq, suliffiit amerlanersaat ilinniagaqarsimanermik piumasaqaatitaqarlutik. Taamaattumik pisariaqaleraluttuinnarpoq, tunngaviusumik piginnaasat piginissaat. Piginnaasat, meeqqat atuarfianni pissarsiarineqartariaqartut. Ullumikkut ajoraluartumik amerlavallaat, piginnaasat pisariaqartut piginagit meeqqat atuarfiannit anisarput, tamanna toqqaannartumik inuusuttut suliffissaaleqineranni annertuumi takuneqarsinnaavoq. Ajornartorsiut annertoorujussuuvoq, arlaatigut iliuuseqarfigisariaqagarput.
Atuarfimmi atuarfiinnaanngilaq. Atuarfigut inuunitsinnut pingaaruteqarluinnartuupput amerlasuunullu katersuuttarfiullutik – tunngaviusumik ilinniagaqarneq pitsaasoq naliittuuvoq. Tassaniluuna aamma nikeriarsinnaaneq takusinnaagipput. Ilassutitut Demokraatit kissaatigaat meeqqat atuarfiata pitsanngorsarnerani aamma anitsiartarfiit pioreersut pinnguartarfiillu pitsanngorsarneqarnissaat. Isumaqarpugut, anitsiartarfiit pitsaasut aalanermut, pinnguarnermut ikinnguteqarnermullu atuarfinni tamani Kommuneqarfik Sermersuumi sinaakkusiinissamut pingaartorujussuusut.
Ilinniarnerup timillu aalatinnera ukkatarigaanni periarfissat takuneqarsinnaalissapput ataatsimoorluta atuarfeqarfik atuarfiillu ataasiakkaat ilinniartitsisullu atuartut klassiannit annillugit periarfissinnissaannut, sanatillugit, paasisassarsiortillugit, aalatillugit inunnillu naapitaqartillugit. Tamanna iluatsissappat, pisariaqartinneqarpoq perorsaasut ilinniartitsisullu nukissallit suliffimminnillu nuannarinnittut piginissaat. Tamanna anguneqassappat isumaqarpugut, nakkutiginninneq anguniakkanillu ukkatarinninneq illuinnaasiortoq annikillillugu tatiginninnerup qaffannissaanut piffissanngortoq.
Timip aalatinnera timilu atorlugu sammisaqarnerup ukkatarinerunissaa kissaatigaarput, suliassanut pikkorissuseq akuutitsinerunerlu atuartitsinermi atorneqarsinnaalluni. Taamattaarlu atuarfiup siulersuisuisa naleqassusaasa ersarissarnerunissaat kissaatigalugu, angajoqqaat peqataanissaannut pilerinarnerulersillugu taamatullu atuarfiit ataasiakkaat kiffaanngissuseqalernissaannik qulakkeerinninnissamut peqataassammata meeqqat iluatinnaatilimmik avatangiiseqarnissaannik pilersitsillutik. Meeqqat atuarfianni atuartut ilinniartitaanermut appakaannissaannut ataqatigiissumik pilersaarusiorneq qulakkeerneqassaaq meeqqat atuarfiat atuartut ataasiakkaat taakkulu angajoqqaavi peqatigalugit akisussaaffimmik tigusippata, meeqqat atuarfiannit aninerminni ingerlariaqqinnissaannut pilersaarusiornikkut.
Ilinniarnertuunngorniarnerup- aamma inuussutissarsiutinut ilinniagaqalernerup aallartinnera meeqqat atuarfianni annerni annertunerusumik eqqarsaatersuutigineqartariaqarpoq, amerlanerusut inuussutissarsiutinut ilinniagaqalerniassammata aammalu naammassinninniassammata. Atuartut ilinniagaqalernissaat siunertaavoq, ilinniarnertuunngorniarnissallu akornanni toqqagassarpassuaqarpoq, aammali atuartut annertuumik ilinniarsimasutut naammassinissaannut periarfissanik alakkaamanninnissaat periarfissaalluni. Inuussutissarsiortut Kommuneqarfik Sermersuullu akornanni suleqatigiinnissamik isumaqatigiissusiortoqassaaq pituttuisumik suliniutip annertusineqarnissaa siunertaralugu, siunissami amerlanerpaat sulilersikkumallugit.
Meeqqat atuarfianni aamma innarluutillit pitsaanerusumik atugaqalernissaat ukkatarerusupparput. Atuartitsineq eqqarsaatigalugu, aammali meeqqat atuarfiannit aninermi ingerlaqqinnissami.
SUNNGIFFIK
Demokraatit kissaatigaat sunngiffiup nukittorsarnissaa aamma pilersaarusiornerata eqqarsaatigeqqinnissaa. Sunngiffik atuarfeqarnerlu eqqarsaatigeqqittariaqarput, suli annertunerusumik Kommuneqarfik Sermersuumi meeqqat inuusuttullu ikorfartorneqarlutik eqeersimaarlutik nukittullutillu ataatsimoorfeqalernissaminnut periarfissaqarniassammata. Kommuneqarfik Sermersuumi sunngiffimmut tunngasunut iliuutsit allanngortinneqarnissaat aallartinneqassaaq, timi atorlugu iliuutsit, piorsarsimassuseq, pinaveersaartitsineq ataatsimoornerillu pingaartinneqassallutik.
Demokraatit isumaqarput, pinaveersaartitsineq timersornermi pitsaasumik ataatsimoornikkut annertunerujussuarmik pingaartinneqartariaqartoq. Pinaveersaartitsinermut suliniutit kapukartuunneqassapput pinaveersaartitsilluni ataatsimoortitsineq sunngiffillu aqqutigalugit, taamaaliornikkut inuusuttuaqqanut paasisitsiniutigineqassammat sunngiffiup pingaassusia peqqinnartumik atassuteqarnermut ataatsimoornermullu.
Anguniagaqarluni suliniuteqarnitsigut qulakkiissavarput, Kommuneqarfik Sermersuumi amerlanerit timiminnik atuinerulernissaat, pingaartumillu meeqqat inuusuttullu amerlanerusut toqqissisimasumik sunngiffimminni ataatsimoornernut peqataasarnissaat. Sipaarniartoqarnerit tamaasa, kultureqarnermut- sunngiffimmullu tunngasuni sipaarniartoqakkajuppoq. Taamaattoqartariaqanngikkaluarpoq.