Apeqqutit marlussuit ugguuna nassuiaateqarfiginiarsarissavakka. Meeraaninniilli inuppaasuit saavani saqqumilaarnissara ajornartorsiutigiuarsimavara. Eqqaamavara atuarfimmi saqqummiissatillunga ajornartorsiutigisarlugu, aammalu suliarisimasama eqqaamaniarnissaat ajornartorsiutigisarlugu. Pinngitsaalisaasutut misigisimatillunga eqqaamanninniarnera ajornartorsiutigisarpara, tamannalu siusinnerusukkut psykologinut oqaloqatigiissutigisarsimavara, taakkulu oqartarput meeraaninni inuusuttuuninnilu atukkat sakkortuut ilaatigut kingunerisinnaagaat, tunuarsimaartuunera uannullu illersorniarlunga tatineqartutut inissittarlunga.

Akuttunngitsumik eqqarsartarpunga, ajunngilanga, qaangereerpara, kisiannili soorlu assersuutigalugu ippassartut qineqqusaartut takugakkit, niviarsiannguaq inuusuttoq meeqqat kinguaassiuutimikkut atornerlunneqartarnerat pillugu apeqquteqaateqarmat, nakkaatigilaarpara qiassaralu uaneralaannguamiilerluni. Ajunngippallaanngilanga, suli qaangerluarsimanngilara. Qineqqusaartuni oqaluttarfimmi nikorfanissara annilaangagaara, aamma taamaattunik aperisoqarpat tappikani nikorfaninnut ilaannarlugu annilaangagaara, angutaavungami naliginnaasoq, inuppassuit ilisarisimanngisama akornanni sapilerusunngitsoq. Nalunngilara sanngiinnermik takutitsinerusoq, kisiannili tassa uanga taamaappunga.

Ilaatigut tarnikkut malugisarpara, angutaallunga meeraanerminik kikkunnut tamanut ammaassinikoq, tamassumalu ilaanni nuanniilliortittarpaanga. Peqqissiminngilangali taamatut iliorsimagama, iliuuserisarami eqqortuummat.

Nuannaarutigaara taassuminnga apeqquteqarmat, taamaaliornermigummi ajornartorsiutip ukkatarineqartuarnissaanik oqariartoqataammat, soorlulu aamma maluginiaringa, partiinit tamanit ataatsimoorfigineqartoq, ajornartorsiutip iliuuseqarfiginissaa. Massakkulli iliuuseqarTOQARTARIAQARPOQ. Arlaliuvugut, ajornartorsiup nipangiusimaannakkap ammaannissaanik sorsuuteqartugut, taamaattumik suliat tamarmik katersortariaqarput pilersaarusiorneqarlutillu ilumoorussisumillu tiguneqartariaqarlutik.

Kommunalbestyrelsimut isissagaluaruma, sapinngisara tamaat meeqqat angerlarsimaffianniittut tamarmik pitsaanerpaamik ilisimaneqarlutillu ikiorneqarnissaat sulissutigissavara, uanga allarpassuillu meeraagallaratta amigaatigisimasarput. IlisimaSSAVAAT, inersimasup meeqqamut iliuusai oqaasiilu eqqortuunersut eqqortuunnginnersullu ilisimassallugu, minnerpaamillu inummik ataatsimik atassuteqarfigisassaminnik PEQARTARIAQARPUT, arlaannik pisoqarsimappat, pissusissamisuunngitsutut isigisaminnik.

Sapinngisara tamaat, meeqqat inuusuttullu atornerlunneqarnerisigut ajornartorsiutit pillugit kikkut tamarmik suleqatigiinnissaat anguniassavara, eqqartukkamullu ilisimasallit ilanngunneqartuarnissaat anguniassallugu, siunissamilu aaliangiinissanut peqataanissaat anguniassallugu.