QINEQQUSAARNERMI PROGRAMMI
Peqqinneq- isumaginninneq aamma utoqqarnut politikki
PEQQINNEQ TIMIMILLU AALATITSINEQ
Missiliorneqarpoq, ukiut tulliuttut qulit ingerlaneranni innuttaasut inooriaatsimut pissuteqartumik nappaatillit qaffassimassasut ukiunilu tulliuttuni utoqqaat amerligaluttuinnassasut tamannalu peqqinnissaqarfimmut suliassatigut nanertuutaalissasoq.
Taamaattumik pingaartuuvoq taakku ukkatarissallugit. Demokraatit kissaatigaat, peqqinnissaqarfiup illoqarfinniittut nutaaliorlutik ineriartortinneqarnissaat, aammalu innuttaasut peqqinnerulernissaannut annertunerusumik pinaveersaartitsinerup ilanngunneqarnissaa. Demokraatit kissaatigaat siunniutamut aningaasaliissutit amerlineqassasut, naggataatigut innuttaasut peqqissusaannut kommunillu aningaasaqarniarnerinut iluaqutissatut, taamaaliornikkummi napparsimmavinnut unitsinneqarnissamik passunneqarnissamillu pisariaqartitsisut ikilisinneqassammata.
Tassani timersorneq peqatigiiffiillu namminneq piumassutsiminnik ingerlasut inooriaatsimik pissuteqartumik nappaatit akiorniarnerannut sakkussani immaqa pingaarnersatut isigaagut. Timigissarniarneq aallartissallugu ajornakusoorsinnaasarpoq, ataatsimoorukkaannili ataatsimoornermillu takutitsigaanni, timersoqatigiiffiit peqatigalugit, tamannaasinnaavoq amerlanernik aallartitsinissamut sakkussaasinnaasoq.
Demokraatit aamma kissaatigaat, Kalaallit Nunaanni timersoqatigiit Kattuffiannik suleqateqarnissamut isumaqatigiissuteqartoqassasoq maannakkut timersornermut politikkip ineriartortinnissaanut. Timersornikkut kulturikkullu inuuneq pitsaasoq ataqatigiinnermik pilersitseqataasarpoq inuunerinnerulernissamullu tapertaassalluni.
Taakkunani Demokraatit aamma isiginiarniarpaat, meeqqat atuarfianni ilinniartitsisut peqataatinnissaannut periarfissat, timersornerup timimillu aalatitsinissap ukkatarineqarnissaanut, taamatullu qulakkiissallutigu inuiaqatigiit peqqissuunissaannik ingerlatamut INUUNERITTA III tamakkiisumik peqataanissatta qulakkeernissaa.
ISUMAGINNINNIKKUT SULINIUTIT
Naleqartitsinissamik iliuutsip taassuma Kommuneqarfik Sermersuumi innuttaasut amerlanerit ikiorsissavai neriuuteqarnermik anguniakkanillu piviusunngortitsinissamut aallaaveqalernissaannut. Suliniutit suli amerlanernut pitsaasumik inuuneqalernissamut pilersitseqataassapput, timikkut tarnikkullu innarluuteqalersimasunut, inuuniarnikkut atornerluinermilluunniit unammilligassaqartunut. Atornerluinermummi ukkatarinninnitta annertusinissaa sulissutigilluinnarparput. Akueraarput, tamanna piffissamik atuiffiussasoq aammalu eqqissilluni allanngorartuunngitsumillu ukkatarinninnermik pisariaqartitsissasoq suliniutinik pilersitsiuarnissanut, tapersiissutaassammat, aanngajaarniutinik imigassamillu atornerluisut katsorsarnerannut.
Demokraatit kissaatigaat pinaveersaartitsinerup nukittorsarnissaa ilaqutaasunullu suliniartoqarnissaa. Anguniagaavoq ikinnerusut – pingaartumik inuusuttut – atornerluinermut appakaatinnginnissaat aammalu atornerluisunut qanigisaasut eqqortumik tapersersorneqarnissaat.
Ajoraluartumik suli meeqqat amerlavallaat sumiginnarneqarput, inuit amerlavallaat inuunerminnik naammagiliinngillat amerlavallaallu imminnut toquttarlutik. Allatut ajornartumik tamakku piviusut nassuerutigisariaqarpagut allatullu ajornartumik iliuuseqarfigisariaqarlugit. Suliat assersuusiorlugit nangissuagut imminullu toquttarnerup pinaveersaartinneranut iliuusissat aallartillugit.
Sapiittariaqarpugut sapiissuseqarnerusariaqarlutalu aaqqiiniarnernut sakkussanillu nutaanik aallartitsinissatsinnut ileqqutoqqanik allanngortitsinikkut. Paasinnittaasera malillugu imaappoq, toqqissisimaffigisarput qimallugu eqqarsarsinnaasariaqartugut. Annertoorsuarnik allannguutinik ataatsikkut pilersitsisariaqanngilagut – annikittunnguimmi allannguutinik pitsanngorsaatinillu ammaassisinnaapput. ”Annertuumik eqqarsarit – annikittunnguamit allartillutit”.
Sumiginnaanerit pinaveersaartinnerisigut, ilinniartitaanerup pingaartinneratigut innuttaasullu sulinissaannut kajumissuseqalersinnerisigut, ataatsimoorluta ineriartornermik pilersitsisinnaavugut, pisortat aningaasaataannik naatsorsuuteqarneq minnerulersillugu, aammalu ataasiakkaatut nukittulluta inuiaqatigiit pitsaanerusut pilersissinnaallugit.
INNARLUUTILLIT
Demokraatit kissaatigiuarpaat inuit timimikkut tarnimikkullu innarluuteqartut Kommuneqarfik Sermersuumi pitsaasumik atugaqartinneqarnissaat. Suliniarnermi eqqarsaatinut ilaatinneqarput oqilisaassinernut- aamma piginnaanngorsaqqiinermullu inissanik periarfissiisoqarnissaa aammalu periarfissat soorlu assersuutigalugu innarluutillit siunissami suliffeqalernissaminnut atuarnissaminnullu periarfissinneqarnissaat, anguneqarnissaannik annertusaanissaq. Taamatullu innarluutilinnut inissaqartitsinissaq, annertunerujussuarmik qulakkeerneqassammat naligiittut kiffaanngissuseqarlutillu inuunerulernissaat.
UTOQQARNUT POLITIKKI
Demokraatit iluarisimaarpaat inuiaqatigiit allanngornerujussuat, Kalaallit Nunaanni ukiuni makkunani pisoq. Amerlanerit inuunertunerulerput, kommunillu paaqqinninneranik pisariaqartitsisut amerlinerannik kinguneqarpoq. Demokraatit utoqqaat paaqqineqarnerata piujuartussamik qaffanneqarnissaa kissaatigaat. Sulissutiginiarparput, pinaveersaartitsineq aqqutigalugu utoqqaat inuunerminnik namminneerlutik isumaginnissinnaalernissaat. Demokraatit kissaatigaat, Kommuneqarfik Sermersuumi utoqqarnik isumaginninnerup inerisartuarnissaa, utoqqaat tulliuttut annertunermik sivisunermillu imminnut isumagilerniassammata. Demokraatit kissaatigiuarpaat innuttaasunut utoqqarnut, kommunip sulisuinit pikkorissunit paaqqutarineqarnissaminnik isumassorneqarnissaminnillu pisariaqartitsisunut, ataqqinartumik paaqqutarinninnissamik tunniussinissaq.
Ajoraluartumik amerlasuut misigisarpaat, pisariaqartitaraluartik alakkarneqartarnissaq paaqqutarineqarnissarlu kissaatigisartik piffissaqannginneq periarfissaqannginnerlu pissutigalugit pineq ajorlugu. Taamaattumillu pingaaruteqartorujussuuvoq, inooriaatsimik pissuteqartumik nappaatit pinaveersaartinnissaannut ukkatarinninnissarput.
Demokraatit kissaatigaat utoqqaat isummersoqatigineqarnerat aallartinneqassasoq kommunimi utoqqaalluni aqqutigineqarsinnaasut pitsaanerusut pilersinnissaannut periarfissanik oqallinnissaq siunertaralugu. Anguniarneqarpoq ersarissassallugu, qanoq ilioraanni utoqqaat amerlanerusut pisortat angallassissutaannik atuilersinnissaat aammalu qanoq ilillutik amerlanerit periarfissinneqarsinnaanersut illoqarfimmi aaqqissuussanut peqataajartorlutik angalasarnissaannut. Taassuma ilaatigut qulakkeersinnaavaa, amerlanerit kommunip aaqqissuussaanut peqataasalernissaat, isumaqaratta pingaartuusoq Kommuneqarfik Sermersuumi utoqqarni kiserliornerup akiorniarneranut.
Angusassamik toraagalimmik suliniarnerup qulakkiissavaa angerlarsimaffimmi ikiorteqarnissamut periarfissat pitsanngornera aamma nammineq angerlarsimaffigisami pitsaasumik paaqqineqarnissamut periarfissaat pitsaanerusut, taamatullu illuliortiternerit siunissami ima tulluussarneqassasut, utoqqarnut tulluuttunik amerlanernik illuliortiternikkut, utoqqaat nammineq angerlasimaffimmiiginnarnissaat qulakkeerniarlugu.