QINEQQUSAARNERMI PROGRAMMI
Piujuartitsineq nukissiuutinillu ataavartunik atuileriartorneq
Kommunitsinni kusanartorsuarmik avatangiiseqarpugut – illoqarfigut Nuuk, Ittoqqortoormiit, Paamiut imaluunniit Tasiilaq pigaluarutsigit, imaluunniit nunaqarfippassuagut. Pinngortitaq, inuppassuit ornissallugu nuannarisaat – pisuinnaraluaraanni, umiatsiarutta imaluunniit piniariarutta. Ajoraluartumilli isumaqarpugut, Kommuneqarfik Sermersuumi angusaqarluarusussuseqanngippallaartugut, nukissiuutinik ataavartunik atuilernissatsinnut. Tamanna allanngorterusupparput!
Neqeroorutimmi pigeriikkagut, pilerigineqaqaat – taamaattumillu amerlanernik peqartariaqarpugut. Sheltersinik, ikumaartarfinnik, pinngortitami pinnguartarfinnik, aqqusineeqqanik arpaffissanik- aamma pisuffissanik, mountainbikinut ingerlaffissanik amerlanernik kommunitsinni tamarmi peqarnissarput kissaatigaarput – amerlanerit inersimasunut meeqqanullu.
Kommuneqarfik Sermersooq Nuullu alliartorput – sukkasuumillu alliartorlutik. Demokraatini annertusaaneq iluarisimaarsinnaavarput, inuunerissaarnissamut periarfissanik pilersitsimmat. Alliartortitsinerli aamma aallaaveqaruni ajunnginneruvoq nukissiuutinik ataavartunik atuileriartornermik akisussaassuseqarnermillu aallaaveqaruni aammalu tamanut atuutissaguni. Demokraatit pingaarnerpaatut anguniarpaat Kommuneqarfik Sermersuumi tamarmi nukissiuutinik ataavartunik atuileriartornissaq.
Taamaattumillu Demokraatit isumaqarput, kommunitut aammalu suliffeqarfittut siuttuusariaqartugut. Nukissiuutinik ataavartunik atuileriartornermut minnerunngitsumillu piujuartitsinermut siuttuussaagut. Soormimi siunniukkutsigu Kalaallit Nunaanni nukissiuutinik ataavartunik atuileriartornermik siuttuuinnarata, nunarsuarmi nukissiuutinik ataavartunik atuisuni siuttunngorutta?
Minguiaavimmik pilersitsineq nukissiuutinik ataavartunik atuinermut qanormita kinguneqarsinnaava aammalu nioqqutissiassanik atueqqinnerup annertusarnera qanoq kinguneqassava, atortussat kommunitut nammineq siuarsarsinnaasaagut suliffeqarfiit namminersortut kommunimilu suliffeqarfiit peqatigalugit, piujuartitsinermik annertunerusumik inerisaasussat.
Nunami najugaqarpugut, inuit piliaannik silaannaap pissusaata allanngorneranik ersarissorujussuarmik, qanorlu inooriaaseqarnitsinnut sunniisumik. Taamaattumik tupinnanngilaq nukissiuutinik ataavartunik atuinerunissamik silaannaallu allanngoriartorneranut pitsaaqutaasumik sapinngisamik inuunissatsinnut soqutiginnikkatta.
Imaattoqarsinnaanngilaq, innaamiataaginnarluta isumaqassasugut, nammineerluni aaqqikkumaartoq. Allatut ajornartumik unammillernartut ilumoorullugit tigusariaqarpagut, iliuuseqartariaqarlutalu. Aalajangiisartuugutta, aammalu suliffeqarfiugutta innuttaasuuguttaluunniit. Demokraatit upperaat, ineriartorneq mumisinneqarsinnaasoq. Pisariaqarporli, ataatsimoorussamik iliuuseqarnissatsinnut piumassuseqarnerput.
Nukissiuutinik ataavartunik piujuartussanillu pilersitsisariaqarpugut soorlu assersuutigalugu imeq anorilu. Nunarsuarmi tamarmi nukissiuutinik ataavartunik eqqarsartoqarpoq, maanilu uagut taamaaliornissatsinnut pitsaanerusariaqarpugut, naak aallartereeraluarluta.
Taamaakkaluartorli suli ataqatigiissumik assigiimmik siunnerfeqartumik politikkimik pilersitsisinnaasimanngilagut, sakkortuumik silaannaap pitsanngortinnissaanut nukissiuutinillu ataavartunik pilersitsinissatsinnut.
Demokraatinit siunnersuutigaarput paasisimasaqarluartunik inuttalimmik suleqatigiissitaliortoqassasoq, silaannaap pitsanngortinnissaanut nukissiuutinillu ataavartunik pilersitsinissatsinnut politikkikkut qanoq iliorsinnaanitsinnik siunnersuusiortussamik.
Kommuneqarfik Sermersuumi nukissiuutinik ataavartunik soorlu imermik, anorimik seqinermillu pineqarsinnaasunik sanaartornerunissamik periarfissanik misissuissaagut, plastikkinik tikisitsisarnermik millisaasussamik, suliffeqarfiit innuttaasullu atoqqiisarnermik ilisimasaannik annertusaasussamik.